Gerolamo Araolla est nàschidu in Tàtari a metade de su sèculu XVI, in una famìglia famada. Poeta e òmine de crèsia, autore de versos valorosos in limba italiana, sarda e ispagnola, at sinnadu cun sa produtzione poetica sua s´atopu de totu sas limbas de sa Sardigna de assora. Est istadu dischente de su dotore e filòlogu tataresu Gavino Sambigucci. Istudiende lìteras e filosofia s´est fatu dotore in diritu. At cumintzadu sa vida de crèsia solu a mannu, a printzìpiu de s´atividade literària sua.
In su 1582 at pubblicadu su poema Sa vida, su martiriu, et morte dessos gloriosos Martires Gavinu, Brothu et Gianuari, òpera chi est acapiada a cussa de su batoschentos de Antonio Cano, aggarbende su materiale de sa paristòria de sa vida de sos martires turritanos e faghende unu fràigu narrativu prus cumplessu.
Est mortu intre su 1595 e su 1615.
Bibliografia
Sa vida, su Martiriu, et morte dessos gloriosos Martires Gavinu, Protho, et Gianuari, Cagliari, 1582.
Sa vida, su martiriu, et morte dessos gloriosos martires Gavinu, Brotu e Gianuari, Mondovì, G. T. Rossi, 1615.
Sa vida, su martiriu, et morte dessos gloriosos martires Gavinu, Brothu, et Gianuari, a cura di M. Pinna, Sassari, Il Rosello, 2000.
Rimas diversas Spirituales de su Dottore Hieronimu Araolla Sardu Sassaresu, Cagliari,1597.
Su Gavinu triumphante, in G. SPANO Appendice alla sarda ortografia, s.l., s.n., [1840?], pp. 132-231.
Le più belle poesie, a cura di S. Susini, Cagliari, Fondazione il Nuraghe, 1929.
Su velu de Calpurnia, in G. PIRODDA, Sardegna, Brescia, La Scuola, 1992, pp.107-110.