Custu libru – iscritu totu in inglesu – est su resurtadu de una tesi de dotoradu de chirca (PhD) fata apitzos de su sistema fonològicu de sa limba sarda meridionale, mescamente de su limbàgiu faeddadu in sa bidda de Sestu. Su traballu descriet in manera cumprida totu su sistema fonològicu e faghet una descritzione teòrica de s´organizatzione mentale de sas tramas fonèticas chi sunt a sa base de sos fenòmenos annotados. Pro custu motivu, sa publicatzione est de interesse pro sos fonòlogos descritivos e teòricos puru.
![Roberto Bolognesi]()
Roberto Bolognesi (1952-)
Roberto Bolognesi est nàschidu in su 1952 in Biddamassàrgia (CA). S´est laureadu in su 1992 in Limba e literadura italiana e Linguìstica generale a s´Universidade de Amsterdam. In su 1993 traballat pro s´istitutu de chirca olandesu (NWO) e in su 1998 si leat su tìtulu de PhD cun una tesi a pitzus de sa fonologia de su sardu campidanesu de Sestu. Che linguista at traballadu pro sas Universidades de Groninga e de Amsterdam. Est istadu membru de duas cummissiones iscientìficas de sa Regione Autònoma de sa Sardigna pro sa definitziones de sas regulas ortogràficas de sa limba sarda. At publicadu vàrios sàgios e artìculos e àteras tres monografias: Una normalizzazione democratica della lingua sarda unificata. Norme per la convivenza pacifica delle varietà del sardo(Condaghes, 2002); Sardegna fra tante lingue. Il contatto linguistico in Sardegna dal Medioevo ad oggi (Condaghes, 2005; impare cun W.J. Heeringa); La Limba Sarda Comuna e le varietà tradizionali del sardo (RAS, 2007). At curadu sa tradutzione de Sardinian Syntax de Michael A. Jones in italianu e sos atos de duos cunvegnos internatzionales: La lingua sarda: L´identità socio-culturale della Sardegna nel prossimo millennio, Cuartu Sant´Aleni, 1999; Le convergenze parallele. Colmare il divario tra la linguistica accademica e la tutela delle lingue, Paulle, 2007.
Bibliografia
bolognesu.wordpress.com/